Poesie su Minori

 

Minure luntano  

So’ vint’anne e ‘stu core se lagna

pe ‘sti terre sperdute straniere

a Minure sta sempe ‘o pensiere

tengo a mamma ch’aspetta lla’ a mme.

 

E bellezze ‘e Minure luntano

‘na figliola lasciata cu pene

‘na prumessa ‘e turnà a chillu bene

quanta cose me fanno pensà.

 

Chell’addore d’arance e limone

d’e giardine ‘ncantate ‘e Minure

me tormenta cchiù forte ‘stu core

e me fa notte e ghiuorne patè.

 

‘Nu ricordo cu mme me purtaie

d’o paese cchiù bello criato

chillu mare cu ‘o cielo ‘ncantato

quanta cose me fanno sunnà.

 

Si me sonno sultanto Minure

‘stuocchie chiagnano lagrime amare

pens’a mamma e cumpagne e ‘o mare

e cient’anne me pare ‘e turnà.

 

Cchiù su lagno pe vie stramane

e sperduto tra gente straniere

vola vola luntano ‘o pensiero

chiagno ‘nzuonno e me pare ‘e sta llà.

 

di Alfonso Esposito (tassista)

Minure

D’a nascita a oggi

ha sempe sunat e cantate
viecchie, giuvane e guagliune
ancor’ oggi ‘e sient ‘e sunà
chitarre e manduline
triccheballacche e bucabuche
mantenene allere tutta Minure.
Chist’ angule ‘ncantate
‘e sole, mare e luna argentate
pure da’ antichi rumani e state
attirate
verenne Minure
armuniuse e profumate
fravecaine ‘sta villa
vicina a ‘stu belle mare
cu’ suone, danze e cante tradizionale
cca l’ammore
venevane a suspirà.
Io pense a tante paisane
ca pe nu muorz ‘e pane
se ne so’ jute luntane
ma tengono ‘o core scure scure
e a Minure
vurriane turnà